Sumqayıt İnzibati-İqtisadi Məhkəməsi

Şəhər və məhkəmə haqqında qısa məlumat

Azərbaycan Respublikasında məhkəmə sisteminin müasirləşdirilməsi və "Azərbaycan Respublikasının bəzi qanunvericilik aktlarına dəyişikliklər və əlavələr edilməsi haqqında" Azərbaycan Respublikası Qanununun tətbiq edilməsi barədə Azərbaycan Respublikası Prezidentinin 19 yanvar 2006-cı il tarixli Fərmanı ilə Sumqayıt şəhərində Sumqayıt Yerli İqtisad Məhkəməsi təşkil edilmişdir.

Azərbaycan Respublikası məhkəmələri hakimlərinin sayının artırılması və məhkəmələrin ərazi yurisdiksiyasının müəyyən edilməsi haqqında Azərbaycan Respublikası Prezidentinin 17 avqust 2006-cı il tarixli Fərmanı ilə Azərbaycan Respublikası məhkəmələri hakimlərinin sayı artırılmış və Sumqayıt Yerli İqtisad Məhkəməsi üzrə 2 hakim vəzifəsi müəyyən edilmişdir. Azərbaycan Respublikası Prezidentinin 28 iyul 2007-ci il tarixli Sərəncamı ilə Bəşirov Çingiz Adil oğlu Sumqayıt Yerli İqtisad Məhkəməsinin hakimi təyin edilmişdir.

Azərbaycan Respublikası Prezidentinin 07 avqust 2008-ci il tarixli Sərəncamı ilə Bəşirov Çingiz Adil oğlu Sumqayıt Yerli İqtisad Məhkəməsinin sədri, Məmmədov Zaur İkram oğlu isə Sumqayıt Yerli İqtisad Məhkəməsinin hakimi təyin edilmişdir. Azərbaycan Respublikası Prezidentinin məhkəmə sistemini təkmilləşdirmək və “Məhkəmələr və hakimlər haqqında” və “Məhkəmə Hüquq Şurası haqqında” Azərbaycan Respublikasının qanunlarına dəyişikliklər və əlavələr edilməsi barədə 15 iyul 2010-cu il tarixli Fərmanı ilə Sumqayıt Yerli İqtisad Məhkəməsinin əsasında (bazasında) Sumqayıt İnzibati-İqtisadi Məhkəməsi təşkil edilmişdir.

Azərbaycan Respublikası Prezidentinin 13 dekabr 2010-cu il tarixli Sərəncamı ilə inzibati-iqtisadi məhkəmələrin təşkili ilə əlaqədar Sumqayıt Yerli İqtisad Məhkəməsinin hakimləri Bəşirov Çingiz Adil oğlu, Məmmədov Zaur İkram oğlu Sumqayıt İnzibati-İqtisadi Məhkəməsinin hakimləri, həmin sərəncamla Bəşirov Çingiz Adil oğlu Sumqayıt İnzibati-İqtisadi Məhkəməsinin sədri təyin edilmişlər.

Azərbaycan Respublikası Prezidentinin 26 oktyabr 2010-cu il tarixli Sərəncamı ilə Cəmilova Xəyalə Adil qızı, Quliyev İsmayıl Rza oğlu və Pirverdiyev Zaur Rafiq oğlu Sumqayıt İnzibati-İqtisadi Məhkəməsinin hakimləri təyin edilmişlər və bu sərəncam 2011-ci il yanvarın 1-dən qüvvəyə minmişdir.

Azərbaycan Respublikası Prezidentinin 09 avqust 2010-cu il tarixli 310 nömrəli Fərmanı ilə Sumqayıt İnzibati-İqtisadi Məhkəməsinin yurisdiksiyasına aid olan ərazi vahidləri:

Abşeron rayonu, Xaçmaz rayonu, Xızı rayonu, Qobustan rayonu, Quba rayonu, Qubadlı rayonu, Qusar rayonu, Siyəzən rayonu, Sumqayıt şəhəri, Şabran rayonu, Şamaxı rayonu, Şuşa rayonu və Zəngilan rayonu.

Sumqayıt Bakıdan sonra Xəzər sahillərində yerləşən ən böyük şəhərdir. Bu şəhər Xəzər dənizinin (gölünün) qərb sahilində, Abşeron yarımadasının şimalında, Sumqayıtçayın mənsəbində, ölkə paytaxtı Bakı şəhərindən 30 km şimalda yerləşir. Şəhərin təməli gənclər tərəfindən qoyulmuşdur. Sonralar Sumqayıt sənaye, kimyaçılar və inşaatçılar şəhərinə çevrilmişdir. Əvvəllər kiçik yaşayış məntəqəsi olan Sumqayıt 1938-ci ildə Bakı neft sənayesini elektrik enerjisi ilə təmin edərək İES tikintisi ilə şəhər tipli qəsəbəyə çevrilmişdir. 1946-53-cü illərdə boru-prokat, sintetik kauçuk və alüminium zavodlarının tikilməsi ilə əlaqədar qəsəbə inkişaf edib şəhərə çevrilmiş və şəhər 22 noyabr 1949-cu ildə yaranmışdır. Sumqayıtın ərazisi 83 kvadrat km-dir. Şəhərin tərkibinə Sumqayıt şəhəri, Hacı Zeynalabdin Tağıyev və Corat qəsəbələri daxildir. Sumqayıt şəhərinin ölkənin digər rayon və şəhərləri, eləcə də xarici dövlətlərlə respublika əhəmiyyətli avtomobil və dəmir yolları vasitəsilə əlaqəsi vardır. Şəhərin ərazisində tikinti materiallarının (kərpic yüngül doldurucuları) istehsalı üçün təbii ehtiyatlar vardır. Şəhərin ərazisindən Sumqayıt çayı axır. Samur-Abşeron kanalı Sumqayıtın cənubundan keçərək Ceyranbatan su anbarına tökülür. Sumqayıt şəhərində və qəsəbələrində 357 minə yaxın əhali, 63 min nəfər qaçqın və məcburi köçkün yaşayır. Sumqayıt şəhərində 325.6 min nəfər, H.Zeynalabdin qəsəbəsində 22.9 min, Corat qəsəbəsində isə 9.4 min nəfər əhali yaşayır.

Əhalinin 30%-i uşaqdır, əmək qabiliyyətli əhalinin sayı 147 min, işləyənlərin sayı isə 58.4 min nəfərdir. Onlardan 20 min nəfəri sənayedə, 18.3 min nəfəri isə büdcə təşkilatlarında çalışır.

Sumqayıtda hal-hazırda Sumqayıt Dövlət Universiteti, Qızlar Seminariyası, tibb və musiqi texnikumları, dram teatrı, mədəniyyət sarayları və sair fəaliyyət göstərir. Yerli telestudiya kimi “DÜNYA TV” kanalı fəaliyyət göstərir.