Fjögur mörk FH og bikartitill númer tvö
Tvær vítaspyrnur FH í fyrri hálfleik
FH-ingar tryggðu sér í dag annan bikarmeistaratitilinn í sögu félagsins með fjögurra marka sigri á KR í úrslitaleik á Laugardalsvellinum að viðstöddum 5.438 áhorfendum. Fyrstu tvö mörk leiksins komu úr vítaspyrnum og var Matthías Vilhjálmsson að verki í bæði skiptin, fyrst á 35. mínútu og svo aftur á 41. mínútu.
Fleiri mörk voru ekki skoruð í fyrri hálfleik og þriðja mark leiksins leit dagsins ljós á 75. mínútu, þegar Atli Viðar Björnsson skoraði með skoti úr vítateignum. Sigurinn innsiglaði svo Atli Guðnason með góðu marki eftir fyrirgjöf frá hægri kanti.
Stærsti sigur í úrslitaleik bikarkeppninnar var sigur Fram á Víði Garði árið 1987, 5-0. Aðeins einu sinni áður hefur unnist fjögurra marka sigur í úrslitaleik, en það var árið 1964 þegar KR-ingar unnu Skagamenn 4-0.
FH-ingar fögnuðu gríðarlega í leikslok ásamt fjölmörgum stuðningsmönnum sínum sem skemmtu sér auðvitað konunglega og voru til fyrirmyndar í stúkunni.
